ghard

tum band kar lo darwaaze apne
ek aandhi chali hai
iski dhool bhed degi tumhari aankhon ko
fir dimag ke raaste se hote huye,
sama jaegi tumhari nason me,
khun ban ke.
tab tum apni zindagi kho doge
kyuki maayne badal jaenge tumhare astitva ke
aur aise badlenge ki pehchaan nahi paoge tum apne aapko
koi sheesha kaam nahi aega.
mujhe poora vishwaas hai ki tum ye kattai nahi chahte,
aur chahoge bhi kyu,
aakhir kyu tumhe tyagna pare apna jeevan,
jisme tum apne hi khuda ho,
tumhe pasand hai apna ghar,
apni naukri,
apni gaadi,
apne log,
apni khushiyaan,
apne gham bhi acche lagte hain tumhe,
tum sambhal ke rakhte ho unko;
apni ranjishen kitni pyari hai tumhe,
roz paani dete ho unko;
kahaan ye aish milegi tumhe.
apne is ghere se nikalte hi
parkhachche ud jaenge tumhaare,
kahaan sambhlegi tumse zamane ki ye gard,
khamkha chotil ho jaoge.
tumhe apni zindagi ka maayna mil gaya hai,
tum usi ghere me hi ache ho,
mat aao baahar,
band kar lo darwaaze apne.